U Rwanda ni kimwe mu bihugu byamaze kwemeza ko bizitabira Imurikagurisha mpuzamahanga ry’indabo rizwi nka ‘International Floriculture Trade Fair’ rizabera mu Buholandi.
Muri iri murikagurisha rizaba guhera tariki 9-11 Ugushyingo 2022 u Rwanda ruzaba ruhagarariwe n’Ikigo gikora ubuhinzi n’ubucuruzi bw’indabo cya Bella Flowers.
Iri murikagurisha rizitabirwa kandi n’ibindi bigo biturutse mu Rwanda birimo, Oxfam Rwanda na DUHAMIC-ADRI.
Iri murikagurisha ngarukamwaka rimaze imyaka 12 ribera mu Buholandi uretse gusa imyaka ibiri ryahagaritswe n’icyorezo cya Covid-19. Biteganyijwe ko uyu mwaka ‘International Floriculture Trade Fair’ izitabirwa n’abamurika barenga 660, mu gihe rizarangira risuwe n’abarenga ibihumbi 18.
Umwaka ushize, Ambasaderi w’u Rwanda mu Buholandi, Olivier Nduhungirehe yabwiye IGIHE ko buri mwaka uko u Rwanda rwitabiriye rugira icyo rwigira mu imurika nk’iri kubera ko ruhahurira n’inzobere zo mu bindi bihugu uko byateje imbere ubwo bucuruzi bw’indabo.
Yakomeje agira ati “Bidufasha kugira ngo natwe ubutaha tuzabinoze. Na cyo ni ikintu gikomeye kuko iyo uhahuriye n’ibihugu birenga 30, buri gihugu gifite ibyo cyagezeho. Natwe nk’u Rwanda ni umwanya mwiza wo guhererekanya ubumenyi.”
Ikigo Bella Flowers cyatangiye gukora ubuhinzi bw’indabo mu 2016; gikorera kuri hegitari 40. Gikoresha abakozi bagera kuri 700.
Kimaze kohereza mu mahanga indabo zifite agaciro ka miliyari 10,3 z’Amafaranga y’u Rwanda. Mbere ya Covid-19, Bella Flowers yoherezaga toni 30 z’indabo mu cyumweru, ubu byaragabanutse zigera kuri toni 20.
Mu mwaka wa 2019/2020, indabo zagurishijwe mu Rwanda zari zifite agaciro ka miliyoni 4 z’Amadolari; mu 2020/2021 agaciro kazo kageze kuri miliyoni 7,9 z’Amadolari.
Reba amafoto agaragaza ’Bella Flowers’ ubwo yitabiraga iri murika mu 2021
Ikigo nyarwanda gihinga indabo z’amaroza, Bella Flowers, cyatangaje ko kigiye gushyira ku isoko ubwoko bushya, buzagera ku bakunzi b’indabo mu gihe kitarenze amezi abiri.
Byatangajwe mu gihe iki kigo gikomeje guherekeza irushanwa ry’amagare rya Tour du Rwanda 2023, rikomeje kuzenguruka ibice bitandukanye by’u Rwanda kugeza mu mpera z’iki cyumweru.
Ni irushanwa iki kigo cyitabiriye nk’umuterankunga unarimbisha ahabereye isiganwa, ndetse kinahemba umukinnyi uba wacomotse mu bandi akabirukansa ku ntera ndende, Longest Breakaway.
Umukozi ushinzwe ubucuruzi muri Bella Flowers, Keagan Rucogoza, yabwiye IGIHE ko bagiye kwagura amahitamo abakiliya bafite mu bijyanye n’indabo z’amaroza.
Yagize ati “Twongere gushishikariza abakwirakwiza indabo zacu kuza kurangura indabyo ku bwinshi, kuko noneho dufite n’amaroza mashyashya, twashyize ku isoko, azaba ageze ku isoko mu gihe kitarengeje amezi abiri.”
Ni icyemezo iki kigo gitangaje mu gihe abantu batandukanye bacyizihiza ukwezi kwa Gashyantare, kubamo umunsi w’abakundana witiriwe Saint Valentin.
Mu irushanwa rya Tour du Rwanda, iki kigo kivuga ko cyifuza kugira abafatanyabikorwa hirya no hino mu gihugu, baranguza indabo za Bella Flowers.
Indabo ni impano waha umuntu wawe kuko umwishimiye, yagize ibirori, isabukuru n’ibindi.
Ku bifuza kuba abafatanyabikorwa ba Bella Flowers bashobora guhamagara kuri 0784 442 711.
Mu bakinnyi bamaze gushimirwa na Bella Flowers mu irushanwa rya Tour du Rwanda 2023, harimo James Fouche, Marc Pritzen, Nsengimana Jean Bosco, Mark Stewart n’icyamamare Chris Froome wahembwe kuri uyu wa Kane, ubwo hasozwaga agace ka gatanu kahagurukiye mu Karere ka Rusizi kagasorezwa mu Karere ka Rubavu.
Iki kigo gifite imirima y’indabo zitandukanye mu Karere ka Rwamagana, mu Ntara y’Iburasirazuba.
Ikigo Nyarwanda gihinga Indabo z’Amaroza, Bella Flowers, cyishimiye guhemba icyamamare Chris Froome muri Tour du Rwanda 2023 yegukanywe n’Umunya-Eritrea, Henok Mulubrhan.
Christopher Clive Froome w’imyaka 37 akinira Israel–Premier Tech yo muri Israel. Ni umwe mu bakinnyi bari bahanzwe amaso mbere y’uko Tour du Rwanda 2023 itangira. Uyu Mwongereza ni umunyabigwi mu gusiganwa ku magare kuko yegukanye Tour de France enye.
Muri Tour du Rwanda ntiyahiriwe kuko mu minsi umunani irushanwa ryamaze yagaragaye cyane umunsi umwe. Hari ku wa 23 Gashyantare 2023 ubwo hakinwaga Etape ya Gatanu yahagurukiye mu Karere ka Rusizi igana mu ka Rubavu.
Uyu munsi waramuhiriye kuko yabaye umukinnyi wacomotse mu bandi akagenda ibilometero byinshi ayoboye, ibizwi nka ’Longest Breakaway’. Ibi byatumye yambikwa na Bella Flowers, ihemba umukinnyi wayoboye isiganwa igihe kirekire.
Muri etape ya gatanu, abakinnyi bagenderaga cyane mu gikundi, bake bakagerageza kuyobora isiganwa ariko batangira kwiyungurura ubwo Chris Froome yabasigaga nyuma yo kwinjira i Karongi.
Gusa, uyu mukinnyi yagize ibyago byo gutobokesha igare ubwo yari amaze gusohoka muri Gishwati, abandi bamucaho.
Si uguhemba abakinnyi gusa kuko Bella Flowers ni nayo muterankunga w’imena urimbisha ahabereye isiganwa hose binyuze mu kuhategura no kuhataka indabo ziteye amabengeza.
Umukozi ushinzwe Ubucuruzi muri Bella Flowers, Rucogoza Keagan, yavuze ko hari uduhigo tubiri iki kigo cyavanye muri Tour du Rwanda.
Yagize ati “Mbere na mbere turishimira uduhigo tubiri tuvanye muri Tour du Rwanda, two kuba aritwe gusa twajyanye na buri mukinnyi wese wahembwe, kuko yahabwaga indabo zacu. Ikindi nitwe twenyine twabashije guhemba umukinnyi watwaye Tour de France enye, ari we Chris Froome.”
Indabo ni impano umuntu ashobora kugenera undi kuko amwishimiye cyangwa yagize ibirori birimo isabukuru n’ibindi.
Rucogoza yavuze ko mu kurushaho kwegera abakiliya, bagiye gukomeza gusura abafatanyabikorwa babo bari mu turere dutandukanye no gushyiraho abashya aho batari.
Bella Flowers ni umushinga ukorera ubuhinzi bw’indabo ku buso bwa hegitari zigera kuri 60, uhinga amoko 16 y’indabo za rose mu mabara icumi. Ni indabo zikunzwe cyane ku masoko y’i Burayi na Aziya no mu bihugu bya Afurika.
Iki kigo giherutse gutangaza ko kigiye gushyira ku isoko ubwoko bushya bw’indabo z’amaroza bitarenze amezi abiri.
Imibare yo mu 2020 yerekana ko Bella Flowers yoherezaga mu mahanga hagati ya toni 20 na 30, ndetse yinjije arenga miliyari 10 Frw mu myaka ine yari imaze itangiye. Icyo gihe, Leta yari imaze kuyishoramo arenga miliyari 13 Frw kuva mu 2016.
Bella Flowers itanga akazi ku biganjemo abo ku gicumbi cyayo i Rwamagana kuko mu bayikorera, abagera ku 1000 ni ho bakomoka.
Ubuyobozi bwa ‘Bella Flowers’ bwemereye abakobwa bari guhatanira ikamba rya Miss Rwanda mu 2022, ko abazashaka gushora imari mu bucuruzi bw’indabo bazafashwa kubona izo gutangiriraho.
Ubuyobozi bwa ‘Bella Flowers’ bwabyemereye abari guhatanira ikamba rya Miss Rwanda mu minsi ishize ubwo aba bakobwa basuraga iki kigo gihinga kikanategura indabo.
Mu kiganiro na IGIHE ubuyobozi bwa Miss Rwanda bwahamije aya makuru, umwe mu bo twaganiriye yagize ati “Nibyo, ubuyobozi bwa Bella Flowers bwemereye igishoro abakobwa bafite igitekerezo cyo gucuruza indabo.”
Umukobwa wifuza kwinjira mu bucuruzi bw’indabo azafashwa kubona indabo zo gutangiza nk’igishoro.
Kugeza ubu abakobwa 20 bari guhatanira ikamba rya Miss Rwanda 2022 bari mu mwiherero muri hotel La Palisse i Nyamata aho bagomba kumara ibyumweru bitatu.
Mu mwiherero wa Miss Rwanda haberamo ibikorwa birimo no gusura ibigo bitandukanye by’ababa bateye inkunga iri rushanwa.
Bella Flowers ni ikigo gihinga kikanatunganya indabo zijyanwa ku isoko, kikaba kimwe mu baterankunga bamaze igihe bakorana na Miss Rwanda.
Mu 2020 ubwo IGIHE yasuraga iki kigo, cyasaruraga uduti tw’indabo turi hagati y’ibihumbi 150 na 210 ku munsi, indabo gihinga zose ziba ari amaroza ari mu moko 18 mu mabara icumi.
Ubuyobozi bw’uyu mushinga icyo gihe bwavugaga ko Leta yari imaze gushoramo arenga miliyari 13 Frw kuva mu 2016, ariko ukaba wari umaze kwinjiriza Leta miliyari 10 na miliyoni 300 Frw.
Ubuyobozi bw’umushinga Bella Flowers uhinga indabo mu karere ka Rwamagana, buratangaza ko mu myaka ine utangiye umaze kwinjiriza igihugu miliyari 10 na miliyoni 300 z’amafaranga y’u Rwanda.
Ubuyobozi bw’uyu mushinga buvuga ko nubwo icyorezo cya coronavirus cyawugizeho ingaruka, ariko ubu watangiye gukora ndetse hakaba hari icyizere ko ibyo ukora bigiye kurushaho gutera imbere.
Umuyobozi muri Bella Flowers, Muganga Walter, yabwiye Televiziyo y’Igihugu ati Ati “Buri cyumweru twohereza toni 20 ariko mbere ya COVID19 twageraga kuri toni 30, ariko indabo zongeye kugira isoko, kuko twatangiye kubona indege aho cargo za RwandAir zidufasha kugira ngo twohereze indabo zacu mu mahanga turabona ko mu gihe kiri imbere twongera tugasubira muri business nta kibazo.’’
Uyu mushinga watangiriye kuri hegitari 35, zirimo 20 zari ziteyeho indabo na 15 zari ziriho ibikorwa remezo.
Ubuyobozi bw’uyu mushinga buvuga ko leta imaze gushoramo arenga miliyari 13Frw kuva mu 2016, ariko nawo umaze kwinjiriza leta miliyari 10 na miliyoni 300 bivuze ko ayashowemo amaze kugaruzwa ku rugero rwa 78%.
Umunyamabanga wa Leta muri Minisiteri y’ubuhinzi n’ubworozi, Dr Ngabitsinze Jean Crysostome, yavuze ko hari gahunda yo gukomeza kwegurira ibikorwa nk’ibi abikorera bagafatanya na leta.
Yagize ati “Imishinga nk’iyi hari gahunda yo kuyegurira abikorera bagafatanya na leta, kuba umushinga wari ugitangira abantu bagira ngo ubanze ufate neza, ntabwo wawuha abikorera utarakomera, gusa ntabwo leta yajya mu mushinga kuva utangiye, turateganya ko mu minsi iri imbere twazashyiramo abikorera bagafatanya na leta.”
Ubuyobozi bw’uyu mushinga buvuga ko mbere ya coronavirus bapakiraga indabo zijya mu mahanga inshuro esheshatu mu cyumweru, ariko ubu bapakira inshuro eshatu gusa.
Kugeza ubu uyu mushinga uri kuri hegitari 40 ariko biteganyijwe ko mu myaka ibiri uzaba uri kuri hegitari 100, harimo 40 ziriho ibikorwa remezo.
Kugeza ubu uyu mushinga wahaye akazi abakoze 700, ku buryo buri kwezi uhamba miliyoni 65 z’amafaranga y’u Rwanda.
Abakoramo bavuga ko wabateje imbere. Umwe muri bo witwa Nyirabahire Rachel yagize ati “Kugeza ubu mfatanya n’umugabo wanjye kubaka urugo, ubu kandi naguzemo inka ubu mfite ahantu ngemura amata buri munsi iyo nje mu kazi kandi biramfasha.”
Ikigo cy’Igihugu gishinzwe guteza imbere ibyoherezwa mu mahanga bikomoka ku buhinzi (NAEB) cyatangaje ko umusaruro w’indabo u Rwanda rwohereza mu mahanga ukomeje kwiyongera, aho hagati ya Mutarama n’Ugushyingo 2019 rwoherejeyo ibiro 708 861, bifite agaciro ka miliyoni 3.5$, ni ukuvuga asaga miliyari 3.3 Frw.
NAEB igaragaza ko hagati ya Nyakanga 2017 na Werurwe 2018, u Rwanda rwohereje mu mahanga indabo zifite agaciro ka miliyoni 2.8$ mu gihe mu mwaka w’ingengo y’imari wa 2016/2017 rwoherejeyo izifite agaciro ka miliyoni 1.2$. Bisobanuye ko umusaruro wikubye inshuro ebyiri.
Abakobwa 19 bari mu mwiherero wa Miss Rwanda 2020 basoje ingendo bakoreraga mu bigo bitandukanye bitera irushanwa inkunga birimo Banki y’Ubucuruzi ya Ecobank, Bella Flowers n’Uruganda rwa Africa Improved Food.
Kuva aba bakobwa bakwinjira mu mwiherero ku wa 9 Gashyantare 2020 bagiye basura ahantu hatandukanye ndetse bakira abashyitsi banyuranye mu rwego rwo kwiyungura ubumenyi.
Mu ngendo za nyuma aba bakobwa bakoze mbere y’uko irushanwa rya Miss Rwanda rirangira basuye ibigo bikomeye nka Ecobank (Umuterankunga mukuru wa Miss Rwanda 2020), Bella Flowers izahemba Nyampinga uberwa n’amafoto na Africa Improved Food izahemba Nyampinga w’u Rwanda 2020.
Ku wa Kabiri tariki 18 Gashyantare 2020 nibwo aba bakobwa basuye Ecobank basobanurirwa birambuye imikorere y’iyi banki ndetse banaganirizwa kuri serivisi zitandukanye itanga.
Abakobwa bashishikarijwe kuzirikana gahunda ya Leta yo kutagendana amafaranga mu ntoki [cashless], banasabwa gukangurira abo mu miryango yabo inshuti n’abavandimwe iyi gahunda ifite uruhare rukomeye ku iterambere ry’igihugu no gucunga umutekano wa buri wese.
Kuri uwo munsi banasuye Bella Flowers, aho berekewe uburyo bahinga indabo ndetse bakazitunganya kugeza zigeze ku isoko. Bibukijwe ko ubuhinzi bw’indabo ari kimwe mu bishobora kwinjiriza Abanyarwanda amafaranga mu gihe babukangukira ariko nanone bigakorwa kinyamwuga kuko buri mu butanga umusaruro ushimishije.
Aba bakobwa bishimiye ubumenyi bungukiye muri iki kigo cyane ko hafi ya bose mu buzima busanzwe bakunze kugura indabo zo guha abantu banyuranye ku minsi mikuru yabo cyangwa igihe bagiye gutabara umuntu witabye Imana. Buri mukobwa yavuye muri iki kigo ahawe impano y’ururabo.
Abakobwa bahataniye ikamba rya Nyampinga w’u Rwanda ku wa Gatatu tariki 19 Gashyantare 2020 basuye African Improved Food, ikigo gitunganya ifu zo mu bwoko bunyuranye zitegurwamo igikoma gikundwa na benshi.
Nyuma yo gutemberezwa mu ruganda basobanurirwa uburyo ifu z’ibikoma zitegurwa, abakobwa bagize umwanya wo kugisangira n’abayobozi ba AIF bishimira akamaro k’ifu z’igikoma zikorerwa muri uru ruganda.
Aba bakobwa bashimiye uru ruganda uburyo rukomeje kunganira Leta mu kurwanya imirire mibi mu bana n’abantu bakuru rubagezaho ifu zifite intungamubiri kandi ku giciro cyiza.
Ubuyobozi bwa Africa Improved Food bwasabye aba bakobwa kubabera aba ambasaderi beza bakamenyekanisha akamaro k’ifu zirimo intungamubiri zikorerwa muri uru ruganda bityo imiririre mibi igahashywa mu Banyarwanda.
Ibi bigo aba bakobwa basuye byashyize akadomo ku ngendo bakoreye ahantu hatandukanye cyane ko hasigaye amasaha make bakajya mu irushanwa rizatangarizwamo uwegukanye ikamba rya Miss Rwanda 2020.
Kugeza ubu irushanwa rya Miss Rwanda 2020 riri kugana ku musozo abakobwa bahatanira ikamba bari mu mwiherero mbere y’amasaha make ngo hamenyekane uzegukana ikamba.
Aba bakobwa bari mu mwiherero bamaze kuvamo umwe cyane ko ubu basigaye ari 19 nyuma y’uko Ingabire Jolie Ange asezeye mu irushanwa kubera uburwayi.
Umukobwa uzambikwa ikamba rya Nyampinga w’u Rwanda 2020 uzasimbura Nimwiza Meghan ufite irya 2019, azamenyekana mu birori biteganyijwe kubera muri Intare Conference Arena i Rusororo mu ijoro ryo ku wa 22 Gashyantare 2020.
Kugeza ubu amatike yo kwinjira mu irushanwa rya Miss Rwanda 2020 yashyizwe ku isoko; abayashaka bashobora kuyagura bifashishije Mobile Money (*182*8*1*333111#), Ecobank cyangwa bakayasanga kuri Camellia KBC, Keza Saloon no kuri Smart Design.
Ikigo cy’ubuhinzi bw’indabyo zoherezwa mu mahanga Bella Flowers, cyashyikirije umukecuru warokotse Jenoside yakorewe Abatutsi, inzu ya miliyoni 8 Frw, cyamwubakiye nyuma y’igihe kinini aba mu yenda kugwa.
Kankuyu Xaverine wahawe inzu ni umwe mu barokokeye mu yahoze ari Komini Muhazi, nyuma y’uko abana batanu n’umugabo bishwe muri Jenoside agasigarana abana babiri gusa.
Inzu yahawe kuri uyu wa Kabiri yubatswe mu Mudugudu w’Akanogo, Akagari ka Bwinsanga mu Murenge wa Gishari. Yubakishije amatafari ahiye, ifite ibyumba bitatu binini n’uruganiriro.
Umuyobozi ushinzwe imari muri Bella Flowers, Muganga Walter, avuga ko igitekerezo cyo kuremera uyu mukecuru cyaturutse mu mikoranire myiza basanzwe bagirana n’ubuyobozi bw’umurenge wa Gishari, ari nabwo bwahisemo uwo bubakira.
Ati “Batweretse uyu mukecuru warokotse Jenoside yakorewe Abatutsi mu 1994 ariko aba mu nzu yangiritse cyane, imvura yaragwaga ukabona iri buyisenye, twahise twiyemeza kumwubakira inzu nshya iyari ihari tukayisenya”.
Muganga yavuze ko banafite ibindi bikorwa biteza imbere imibereho myiza y’abaturage birimo kwishyurira mitiweli abakozi babo bose bagera kuri 600 ndetse n’abandi baturage 300 bo muri uyu murenge wa Gishari.
Kankuyu ashimira ingabo za FPR-Inkotanyi zamurokoye na leta yakomeje kumwitaho ntaheranwe n’agahinda. Avuga ko yabaga mu nzu yubakiwe na Caritas ariko ngo yavaga cyane ku buryo yumvaga rimwe izamugwa hejuru.
Ati “Nitabaje ubuyobozi mbasaba ubufasha, nuko bankorera ubuvugizi aba bantu baranyubakira. Ubu ndishimye cyane kuko ntabwo narinzi ko nanjye narara mu nzu imeze gutya”.
Umuyobozi w’Akarere ka Rwamagana Mbonyumuvunyi Radjab, yashimiye ubuyobozi bwa Bella Flowers ko nyuma y’ubucuruzi bakora bufitiye inyugu igihugu, banarengaho bagafasha abanyarwanda.
Ati“Iyo dutashye inzu nk’iyingiyi biba bivuze ko twongeye gusubiza abacitse ku icumu mu buzima, kubitaho no kubakurikirana tubereka ko batari bonyine ahubwo bari kumwe n’ubuyobozi bw’igihugu bubumva, bubashyigikiye kandi butigeze bubibagirwa”.
Yashimiye Bella Flowers, asaba abandi bafatanyabikorwa gukomerezaho ‘tugakomeza kubaka u Rwanda rwiza rwifuza kandi rutubereye’.
Mbonyumuvunyi yanasabye abanyarwanda muri rusange gukomeza kuba hafi abacitse ku icumu muri ibi bihe kandi bakanakomeza kwitabira gahunda za leta ziba zateguwe.
Bella Flowers ifite ubuhinzi bw’indabyo bungana na hegitari 40, ikoreshamo abakozi bagera kuri 600, aho iri kubwagura ku buryo buzagera kuri hegitari 65.
Indabyo zihahingwa inyinshi zoherezwa mu mahanga izindi zikagurishirizwa mu Rwanda. Umwaka ushize Bella Flowers, yagurishije uduti tw’indabyo turenga miliyoni mirongo 30, tugurishwa miliyari eshatu na miliyoni 260 Frw.
